■■■ထိုင်ဝမ်ရေလက်ကြား စစ်သင်္ဘောစေလွှတ်တဲ့ ကန်နဲ့ ကနေဒါကို တရုတ်ရှုတ်ချ

■■■ထိုင်ဝမ်ရေလက်ကြား စစ်သင်္ဘောစေလွှတ်တဲ့ ကန်နဲ့ ကနေဒါကို တရုတ်ရှုတ်ချ

18-Oct-2021
ထိုင်ဝမ်ရေလက်ကြားကို ပြီးခဲ့တဲ့ သီတင်းပတ်ထဲ အမေရိကန်နဲ့ ကနေဒါတို့က စစ်သင်္ဘောတွေ စေလွှတ်ခဲ့တာဟာ ဒေသတွင်း တည်ငြိမ်ရေးနဲ့ ငြိမ်းချမ်းမှုကို ခြိမ်းခြောက်တာလို့ ပြောပြီး တနင်္ဂနွေနေ့မှာ တရုတ်စစ်တပ်က အပြစ်တင် ဝေဖန်လိုက်ပါတယ်။
တရုတ်စစ်တပ်က ပြီးခဲ့တဲ့နှစ်ထဲ ထိုင်ဝမ်လေကြောင်းကာကွယ်ရေးဇုန် ADIZ ထဲ စစ်လေယာဉ် အများအပြား စေလွှတ်ခဲ့တာအတွက် ထိုင်ဝမ်က စိတ်ဆိုး ဒေါသထွက်နေချိန်မှာပဲ အောက်တိုဘာလ ၁ ရက်နေ့ကစပြီး ၄ ရက်အတွင်း တရုတ်က စစ်လေယာဉ်အစင်း ၁၅၀ ကျော်ကို ထပ်မံစေလွှတ်ခဲ့တာကြောင့် တရုတ်နဲ့ ထိုင်ဝမ်ကြား တင်းမာမှုတွေ ပိုတိုးလာခဲ့သလို ဒီလုပ်ရပ်အတွက် နိုင်ငံတကာကပါ စိုးရိမ်လာစေတာပါ။

ဒါ့အပြင် တနင်္ဂနွေနေ့မှာလည်း တရုတ်က J-16 ဂျက်တိုက်လေယာဉ် ၂ စင်းနဲ့ ရေငုပ်သင်္ဘောဖျက် လေယာဉ်တစင်း ထိုင်ဝမ် ADIZ ဇုန်ထဲ စေလွှတ်ခဲ့တယ်လို့ ထိုင်ဝမ်က ပြောပါတယ်။
အမေရိကန်စစ်တပ်ကတော့ သူတို့ရဲ့ တာဝေးပစ်ဒုံးကျည်တပ် USS Dewey ဖျက်သင်္ဘောဟာ ထိုင်ဝမ်နဲ့ တရုတ်ပြည်မကြီးကို ခြားထားတဲ့ ကျဉ်းမြောင်းတဲ့ရေလက်ကြား ကို ကနေဒါစစ်သင်္ဘော HMCS Winnipeg နဲ့အတူ ကြာသပတေးနဲ့ သောကြာနေ့တွေက ဖြတ်သန်းခဲ့ကြောင်း ပြောပါတယ်။ ဒါ့အပြင် Dewey နဲ့ Winnipeg တို့ရဲ့ အခုလို ထိုင်ဝမ်ရေလက်ကြားကို ဖြတ်သန်းမှုဟာ အမေရိကန်နဲ့ သူ့မဟာမိတ်တွေ၊ မိတ်ဘက်တွေရဲ့ အင်ဒို-ပစိဖိတ်ဒေသ လွတ်လပ်မှုနဲ့ ပွင့်လင်းမှုရှိစေဖို့ သန္နိဋ္ဌာန်ချထားချက်ကို ပြသတာဖြစ်ကြောင်းလည်း ပြောပါတယ်။

PLA တရုတ်စစ်တပ် အရှေ့ပိုင်းဌာနချုပ်ကတော့ ဒီသင်္ဘောတွေကို သူတို့တပ်တွေက စောင့်ကြည့်ခဲ့ကြောင်း ပြောပါတယ်။ ဒါ့အပြင် ထိုင်ဝမ်ဟာ တရုတ်ပိုင်နက် အစိတ်အပိုင်းတခု ဖြစ်တဲ့အတွက် ခြိမ်းခြောက်မှုနဲ့ ရန်စမှုအားလုံးကို တုံ့ပြန်ဖို့ သူတို့တပ်ဖွဲ့တွေ အမြင့်ဆုံးအဆင့်နဲ့ အမြဲတမ်း အသင့်ပြင်ထားကြောင်း ပြောပါတယ်။

ဒီဒေသမှာ အမေရိကန် ရေတပ်သင်္ဘောတွေ လစဉ်လိုလို ရောက်နေတာဟာ ဒေသတွင်း တင်းမာမှုတွေဖြစ်အောင် အမေရိကန်က လုပ်ဆောင်နေတာလို့ တရုတ်က စွပ်စွဲထားတာပါ။ ဗြိတိန်အပါအဝင် အမေရိကန်ရဲ့ မဟာမိတ်တွေဟာ ဒီရေလက်ကြားကို စစ်သင်္ဘောတွေ မကြာခဏ စေလွှတ်လေ့ရှိပါတယ်။

crd
မူရင်းရေးသားသူအားလေးစားစွာခရက်ဒစ်ပေးပါသည်။ကူးယူမျှဝေဖော်ပြခြင်းသာဖြစ်ပါသည်။