အရပ်သားတွေတိုက်ခိုက်ရေးလက်နက်ကိုင်ဆောင်ခွင့်ပိတ်ပင်ဖို့သမ္မတBidenတိုက်တွန်း

အရပ်သားတွေ တိုက်ခိုက်ရေးလက်နက် ကိုင်ဆောင်ခွင့် ပိတ်ပင်ဖို့ သမ္မတ Biden တိုက်တွန်း

ရဲတဦးအပါအဝင် လူ ၁၀ ဦးသေဆုံးစေခဲ့တဲ့ ကော်လိုရာဒိုပြည်နယ် Boulder မြို့ပစ်ခတ်မှုအပြီးမှာပဲ အမေရိကန်သမ္မတ ဂျိူးဘိုင်ဒန်က နိုင်ငံတဝှမ်း တိုက်ခိုက်ရေး လက်နက်တွေအပေါ် ပိတ်ပင်ဖို့ အင်္ဂါနေ့မှာ တောင်းဆို လိုက်ပါတယ်။“လူတွေရဲ့ အသက်ကို ကယ်ဖို့အတွက် လွယ်ကူရိုးရှင်းတဲ့အဆင့်တွေကို လုပ်ဆောင်ရာမှာ တမိနစ်၊ တနာရီလောက် စောင့်နေဖို့မလိုပါဘူး” လို့သမ္မတ ဘိုင်ဒန်က အိမ်ဖြူကနေ အထက်နဲ့အောက်လွှတ်တော် နှစ်ရပ်စလုံးကို အလျင်အမြန်ဆောင်ရွက်ဖို့အခုလို တိုက်တွန်းပြောဆိုခဲ့တာဖြစ်ပါတယ်။

တိုက်ခိုက်ရေး လက်နက်တွေနဲ့ကျည်ပိုအများကြီးထည့်သွင်းနိုင်တဲ့ ကျည်ကပ်တွေကို ကျနော်တို့ပိတ်ပင်နိုင်ပါတယ်လို့လည်း သမ္မတက ပြောသွားတာပါ။ သူကိုယ်တိုင် အထက်လွှတ်တော်အမတ်နဲ့အထက်လွှတ်တော်ရဲ့ တရားရေးကော်မတီဥက္ကဌဖြစ်စဉ်ကလည်း အခုလို အလားတူဥပဒေပြုမှုမျိူးလုပ်ဆောင်ခဲ့တာကိုလည်း အလေးပေးပြောကြားခဲ့ပါတယ်။ အဲဒီ ဥပဒေဟာ ၁၉၉၄ မှာ အတည်ပြုနိုင်ခဲ့ပြီး ၁၀ နှစ်အကြာမှာ သက်တမ်းကုန်ဆုံးခဲ့ပါတယ်။

သေနတ်ဝယ်ယူရာမှာ နောက်ကြောင်းရာဇဝင်တောင်းခံမှုနဲ့ပက်သက်ပြီး ဥပဒေပြုရေး တစ်ဆို့နေခဲ့ရာမှာ အောက်လွှတ်တော်က အတည်ပြုပြီးသားဖြစ်တာမို့အထက်လွှတ်တော်အနေနဲ့လည်းထောက်ခံပေးဖို့ဘိုင်ဒန်က တောင်းဆိုထားပါတယ်။Boulder မြို့ပစ်ခတ်မှုနဲ့ပက်သက်ပြီး သေဆုံးသူတွေရဲ့ မိသားစုဝင်တွေနဲ့အသက်ရှင်လွှတ်မြောက်လာသူတွေနဲ့အတူ စိတ်နှလုံးကြေကွဲရကြောင်း သမ္မတ ဘိုင်ဒန်က ပြောဆိုသွားပါတယ်။

ပြီးခဲ့တဲ့ တနင်္လာနေ့က Boulder မြို့က စတိုးဆိုင်တခုတွင်း ပစ်ခတ်မှုကြောင့် လူ ၁၀ ဦးသေဆုံးခဲ့ရပြီး အသက် ၂၁ နှစ်အရွယ် သံသယရှိသူတဦးကို ဖမ်းဆီးတရားစွဲဆိုထားတယ်လို့ရဲက အင်္ဂါနေ့က ပြောပါတယ်။

credit – VOA