ကန်သတိပေးပြီးနောက်တနေ့တိုင်ဝမ်လေပိုင်နက် တရုတ်ကျူးကျော်

တိုင်ဝမ်ရဲ့ လေကြောင်း ကာကွယ်ရေးဇုံထဲကို တနင်္လာနေ့က တရုတ် ဂျက်လေယာဉ် ၂၅ စင်း ကျူးကျော် ဝင်ရောက်ပျံသန်းခဲ့တယ်လို့ တိုင်ဝမ်အစိုးရက ပြောပါတယ်။ ဒါဟာ ဒေသတွင်းမှာ တရုတ်ရဲ့ ရန်လိုလုပ်ဆောင်မှုတွေ တိုးလာနေတာအတွက် အမေရိကန် နိုင်ငံခြားရေးဝန်ကြီး Antony Blinken သတိပေးပြီး နောက်တနေ့မှာ ဖြစ်ပွားခဲ့တာပါ။

တိုက်လေယာဉ် ၁၈ စင်းအပါအဝင် တရုတ်ဂျက်လေယာဉ်တွေဟာ တိုင်ဝမ်ရဲ့ ADIZ လေကြောင်းကာကွယ်ရေးဇုံထဲကို ဝင်လာတာကြောင့် ထိုင်ဝမ်ကာကွယ်ရေးဝန်ကြီးဌာနကနေ သူတို့ထွက်သွားအောင် သတိပေးချက်တွေ ထုတ်လွှင့်ပြီး လေယာဉ်တွေကို စောင့်ကြည့်ခဲ့ရပါတယ်။ ဒါဟာ ဒီလထဲမှာပဲ ၁၀ ရက်မြောက် ဆက်တိုက် ကျူးကျော်ဝင်ရောက်ခဲ့တာ ဖြစ်ပါတယ်။

တိုင်ဝမ်ဝန်းကျင် အခြေနေပြောင်းလဲအောင် တရုတ်ဘက်က မကြိုးစားဖို့နဲ့ ဒီလိုကြိုစားမယ်ဆိုရင် ကြီးမားတဲ့ အမှားကျူးလွန်တာမျိုး ဖြစ်လာမယ်လို့ တနင်္ဂနွေနေ့က အမေရိကန်နိုင်ငံခြားရေးဝန်ကြီး Blinken က သတိပေးခဲ့တာပါ။

တိုင်ဝမ်ကို တရုတ်တနိုင်ငံထည်းသတ်မှတ်တဲ့ One China ရဲ့ အစိတ်အပိုင်းအဖြစ် သတ်မှတ်မှုကို လက်မခံတဲ့ တိုင်ဝမ်သမ္မတ Tsai Ing-wen၂၀၁၆ ရွေးကောက်ပွဲကနေ တက်လာချိန်ကစပြီး တရုတ်နဲ့ တိုင်ဝမ်တို့ကြား တင်းမာမှုတွေ တိုးလာနေတာပါ။

တရုတ်နဲ့ တိုင်ဝမ်တို့ကြား တင်းမာမှုဟာ အခုအချိန်မှာ အထွဋ်အထိပ်ကို ရောက်နေပြီလို့ အမေရိကန်အရာရှိတွေကရော နိုင်ငံရေးသုံးသပ်သူတွေကပါ သတိပေးနေတာပါ။

မနှစ်တုန်းကလည်း တိုင်ဝမ်ရဲ့ ADIZ လေကြောင်းကာကွယ်ရေးဇုံထဲကို တရုတ်ဂျက်လေယာဉ်တွေ ကျူးကျော်မှုဟာ အကြိမ်ပေါင်း ၃၈၀ လောက်ရှိတယ်လို့ တိုင်ဝမ်အာဏာပိုင်တွေက ပြောပါတယ်။

credit – VOA