ကန်သမ္မတစီစဉ်တဲ့ ဒီမိုကရေစီထိပ်သီးအစည်းအဝေး တရုတ်နဲ့ရုရှားကန့်ကွက်

အမေရိကန်သမ္မတ Joe Biden ကမကထပြုကျင်းပဖို့စီစဉ်ထားတဲ့ ဒီမိုကရေစီ ထိပ်သီးအစည်းအဝေးအတွက် သူတို့ကိုမဖိတ်ဘဲ ချန်ထားတဲ့အပေါ် တရုတ်နဲ့ရုရှားတို့က ဒီကနေ့ အပြင်းအထန် တုံ့ပြန်လိုက်ကြပါတယ်။

ဒီအစည်းအဝေးအတွက် တိုင်ဝမ်ကိုဖိတ်ထားတဲ့အပေါ် တရုတ်က အမျက် ထွက်ပြီး ရုရှားကတော့ ဒီအစည်းအဝေးကို သွေးခွဲတဲ့လုပ်ရပ်အဖြစ် တံဆိပ်ကပ် ပြောဆိုပါတယ်။
နိုင်ငံပေါင်း ၁၁၀ လောက်ကို ဖိတ်ကြားထားတဲ့ ဒီထိပ်သီးအစည်းအဝေးဟာ သမ္မတဘိုင်ဒန်ရဲ့ရွေးကောက်ပွဲ ကတိကဝတ်တခုဖြစ်ပါတယ်။ ဒီမိုကရေစီအစိုးရတွေနဲ့ အာဏာရှင်အစိုးရတွေကြား အားပြိုင်မှုကို နိုင်ငံခြားရေးဆိုင်ရာ သူ့ရဲ့ အဓိကမူဝါဒအဖြစ် သမ္မတဘိုင်ဒန်က သတ်မှတ်ထားတာပါ။

“ဒီမိုကရေစီ ထိပ်သီးအစည်းအဝေးလို့ဆိုတာကို” တက်ဖို့ တိုင်ဝမ်ကို ဖိတ်ကြားတဲ့အပေါ် “အပြင်းအထန် ကန့်ကွက်တယ်” လို့ တရုတ်နိုင်ငံက ပြောပါတယ်။

ဖိတ်ကြားထားတဲ့ နိုင်ငံတွေထဲမှာ အမေရိကန်ရဲ့ အဓိကမဟာမိတ် အနောက်နိုင်ငံတွေသာမက အီရတ်၊ အိန္ဒိယနဲ့ ပါကစ္စတန်နိုင်ငံတို့လည်း ပါဝင်ပါတယ်။

အမေရိကန်နိုင်ငံခြားရေးဌာန ဝက်ဘ်ဆိုက်တ်မှာ အင်္ဂါနေ့ကထုတ်ပြန်ထားတဲ့ ဖိတ်ကြားနိုင်ငံစာရင်းအရ အမေရိကန်ဟာ “ခွဲခြားတဲ့ စည်းသစ်တွေကို ဖန်တည်းဖို့၊ သူတို့အမြင်မှာ ကောင်းတဲ့နိုင်ငံ၊ ဆိုးတဲ့နိုင်ငံဆိုတာမျိုးနဲ့ နိုင် ငံတွေကို သွေးခွဲဖို့ ပိုပြီးလိုလားတယ်” ဆိုတာ ပြနေတယ်လို့ ရုရှားနိုင်ငံကပြောပါတယ်။

ကြေညာထားတဲ့ အတော်ကြာပြီဖြစ်တဲ့ ဒီအစည်းအဝေးကို လာမယ့် ဒီဇင် ဘာလ ၉ ရက်နေ့နဲ့ ၁၀ ရက်နေ့တွေ ကျရင် အွန်လိုင်းကနေ ကျင်းပမှာဖြစ်ပြီး နောက်နှစ်မှာလုပ်မယ့် ဒုတိယအကြိမ် အစည်းအဝေးကတော့ လူကိုယ်တိုင် တက်ရောက်ရမှာဖြစ်ပါတယ်။
အမေရိကန်ပြည်ထောင်စုက မျှော်လင့်ချက် ကြီးကြီးမားမားထားခဲ့တဲ့ နိုင် ငံတွေမှာ ဒီမိုကရေစီ ဆုတ်ယုတ် ကျဆင်းနေချိန်မှာပဲ ဒီထိပ်သီးအစည်းအဝေးကို ကျင်းပမှာဖြစ်ပါတယ်။ဆူဒန်နဲ့ မြန်မာနိုင်ငံတို့မှာ စစ်တပ်က အာဏာသိမ်းတာနဲ့ ကြုံထားရပြီး အီသီယိုးပီးယားနိုင်ငံက အမေရိကန် သံတမန်တွေ အဆိုအားဖြင့် “ပေါက်ကွဲထွက်မယ့်”

အခြေအနေဆီ ဦးတည်သွားနိုင်တဲ့ ပဋိပက္ခတခုအလယ် မှာ ရောက်နေပါတယ်။ အာဖဂန်နစ္စတန်မှာတော့ နှစ် ၂၀ ကျော်ကြာပြီးတဲ့နောက် အမေရိကန်တပ်ဖွဲ့တွေ ပြန်ရုပ်သိမ်းလိုက်အပြီး တာလီဘန်တွေ အာဏာရလာပါတယ်။

VOA