ကန်နဲ့တရုတ် ဥတုရာသီပြောင်းလဲမှု တိုက်ဖျက်ရေး လက်တွဲလုပ်ကိုင်မည်

ကန်နဲ့တရုတ် ဥတုရာသီပြောင်းလဲမှု တိုက်ဖျက်ရေး လက်တွဲလုပ်ကိုင်မည်

အမေရိကန်ပြည်ထောင်စုနဲ့ တရုတ်နိုင်ငံတို့ဟာ ဥတုရာသီ ဖောက်ပြန်ပြောင်းလဲမှု တန်ပြန်ရေးမှာ အတူပူးပေါင်း ဆောင်ရွက်သွားဖို့ အခိုင်အမာ ဆုံးဖြတ်ခဲ့ကြကြောင်း စနေနေ့က နှစ်နိုင်ငံ ပူးတွဲကြေညာချက် ထုတ်ပြန်ခဲ့ပါတယ်။

ဒီကြေညာချက်ဟာ အမေရိကန်ရဲ့ ရာသီဥတုဆိုင်ရာ အထူးကိုယ်စားလှယ် ဂျွန်ကယ်ရီရဲ့ တရုတ်နိုင်ငံ၊ ရှန်ဟိုင်းခရီးစဉ်အတွင်း ဖြစ်ပေါ်လာတာပါ။

“အမေရိကန်ပြည်ထောင်စုနဲ့ တရုတ်နိုင်ငံတို့ ရာသီဥတု ဖောက်ပြန်နေတဲ့ အရေးကိစ္စမှာ အတူတကွ လက်တွဲလုပ်ဆောင်သွားပါမယ်။ တရုတ်နိုင်ငံဟာ ဒီအခက်အခဲကို ဖြေရှင်းဖို့အတွက် ဒါဟာ ပထမဆုံး ပါဝင်လာတာလို့ ကျနော်ထင်ပါတယ်။” လို့ ရာသီဥတုဆိုင်ရာ အမေရိကန် အထူးကိုယ်စားလှယ် ဂျွန်ကယ်ရီက ပြောသွားတာပါ။

မစ္စတာကယ်ရီဟာ အမေရိကန်ရဲ့ နိုင်ငံခြားရေးဝန်ကြီးဟောင်း တယောက်ဖြစ်ပြီး သမ္မတ ဂျိုးဘိုင်ဒန် အစိုးရလက်ထက်မှာ ပထမဆုံး တရုတ်နိုင်ငံကိုသွားတဲ့ အစိုးရအရာရှိတဦးလည်း ဖြစ်ပါတယ်။ ဒါဟာ နှစ်နိုင်ငံကြား တခြားကိစ္စရပ်တွေမှာ ဆက်ဆံရေး အလွန်တင်းမာနေပေမယ့်လည်း ကမ္ဘာလုံးဆိုင်ရာ ပြဿနာတွေမှာတော့ ပူးပေါင်းဆောင်ရွက်ကြမယ့်သဘော ဆောင်နေပါတယ်။

ပူးတွဲကြေညာချက်မှာ ရာသီဥတုဖောက်ပြန်မှုကို ဖြစ်စေတဲ့ ဖန်လုံအိမ်ဓာတ်ငွေ့ ထုတ်လွှတ်မှု ၅၀ ရာခိုင်နှုန်းနီးပါးအတွက် အတူတာဝန်ရှိနေတဲ့ ကမ္ဘာ့စီးပွါးရေး အင်အားကြီးနှစ်နိုင်ငံဖြစ်တဲ့ အမေရိကန်နဲ့ တရုတ်တို့ရဲ့ ပူးပေါင်းဆောင်ရွက်မယ့် လုပ်ငန်းအများအပြားကို ဖော်ပြခဲ့ပါတယ်။

သမ္မတဂျိုးဘိုင်ဒန်ဟာ ရာသီဥတု ဖောက်ပြန်ပြောင်းလဲမှုကို အဓိက ဦးစားပေးလိုက်ခြင်းဟာ ကျောက်ဖြစ်ရုပ်ကြွင်းလောင်စာထုတ် လုပ်ငန်းနဲ့ နီးနီးကပ်ကပ် ဆက်ဆံမှုရှိတဲ့ သမ္မတထရမ့်ရဲ့ လုပ်ရပ်တွေကို လုံးဝပြောင်းလဲလိုက်တာ ဖြစ်ပါတယ်။